فؤاد الاول
فؤاد الأول ( القاهره، 26 مارس 1868 - القاهره، 28 ابريل 1936 ) ملك مصر و تاسع حكامها من أسرة محمد على ، ابن الخديوى اسماعيل ، اتنصب بعد اخوه السلطان حسين كامل فى 9 أكتوبر 1917 ، بعد ما اتنازل الأمير كمال الدين حسين ابن السلطان حسين كامل عن حقوقه فى تولى السلطنه المصريه ، و اتلقب بملك مصر فى مارس 1922 ، و حكم لغاية وفاته. قامت فى عهدةثورة 1919 ، و اضطر الانجليز رفع حمايتهم عن مصر بمقتضى تصريح 28 فبراير 1922 و اتعمل دستور 1923 و اتعملت فى مصر أول وزاره شعبيه برياسة سعد زغلول. حصلت فى عهده مفاوضات كتيره بين مصر و انجلترا بريطانيا بهدف تحديد العلاقات بين البلدين ( مفاوضات زغلول - مانر 1920 ، و عدلى - كرزن 1921 ، و زغلول - رامزى مكدونلد 1924 ، و ثروت - اوستن تشمبرلين 1927 ، والنحاس - هندرسن 1929 - 1930 ) ، و انتهت المفاوضات بتوقيع معاهدة 1936 اللى اعترفت فيها بريطانيا باستقلال و سيادة مصر. بعد ما اتوفى فؤاد الأول خلفه ابنه فاروق الأول.
إتولد الملك فؤاد الاول فى قصر ابوه الخديوى اسماعيل باشا فى القاهره فى 26 مارس سنة 1868 و كان أصغر اولاد الخديوى اسماعيل ولما كبر شويه دخله ابوه المدرسه الخاصه اللى كان انشأها فى قصر عابدين عشان يعلم فيها ولاده و لما فؤاد بقى عنده سبع سنين بعته سويسرا و دخل هناك مدرسة " تودكيم " الخاصه ، لكن و هو فى سويسرا اتخلع ابوه واتنفى على ايطاليافراح فؤاد على هناك و دخل المدرسه الملكيه الاعداديه فى تورينو و بعدها دخل مدرسة تورينو العسكريه و اتخرج منها سنة 1888 و انضم للجيش الطليانى لمدة سنتين بعدها عينه السلطان العثمانلى عبد الحميد ياور ليه فى البلاط السلطانى فى استنبول و بعدين استدعاه الخديوى عباس التانى لمصر و عينه ياور ليه.
فى اكتوبر 1917 اتوفى اخوه السلطان حسين كامل و حسب نظام وراثة العرش كان المفروض ان ابنه الأمير كمال الدين حسين يتنصب سلطان على مصر مكانه لكن الأمير كمال لسبب أو تانى ما رضييش يخلف ابوه على عرش السلطنه المصريه فإتنصب بداله عمه فؤاد يوم 9 اكتوبر سنة 1917 و اتغيرت مصر من سلطنه لمملكه فبقى فؤاد الأول ملك مصر.
إتلقب الملك فؤاد بـ " سيد النوبة وكردفان ودارفور " ، و اترأس اللجنه اللى اتشكلت لتأسيس و تنظيم الجامعه الأهليه ( جامعة القاهرة دلوقتى ). عهد الملك فؤاد الأول حصلت فيه ثورة 1919، ورفعت فيه بريطانيا الحمايه عن مصر و اعترفت بيها مملكه مستقله ليها سياده فأعلن فؤاد الاول استقلال مصر فى 12 مارس 1922. و فى عهده صدر دستور 1923 ، و اتشكلت اول وزاره شعبيه برياسة سعد زغلول.
بعد ما لغى مصطفى كمال اتاتورك الخلافه العثمانليه فى تركيا فى بداية عشرينات القرن العشرين اتعملت محاولات فى مصر عشان يبقى الملك فؤاد " خليفة المسلمين " لكن المحاولات فشلت ، لكن الملك فؤاد سعى عند بريطانيا لتعديل نظام وراثة عرش مصر بحيث يبقى منحصر فى ذريته بدل اكبر افراد الاسره العلويه و نجح فعلاً فى مساعيه فأصدر فى 13 ابريل 1922 النظام الجديد لوراثة العرش فبقى اللقب الرسمى لابنه فاروق هو " حضرة صاحب السمو الملكى الأمير فاروق " و " أمير الصعيد ".
حكم الملك فؤاد لغاية وفاته فى 28 ابريل 1936 و اتدفن فى مسجد الرفاعى فى القاهره و خلفه ابنه فاروق الأول.
ليست هناك تعليقات:
إرسال تعليق